E ardhmja e Ballkanit Perëndimor dhe rëndësia dhe roli i NATO-s për sigurinë dhe stabilitetin e Malit të Zi do të jetë në fokus të Forumit të 13-të të Sigurisë 2BS, i cili fillon sot në Budva, i organizuar nga Aleanca Atlantike e Malit të Zi.

Përfaqësuesi special i Bashkimit Evropian për dialog Miroslav Lajçak, tha se është i nevojshëm normalizimi i marrëdhënieve ndërmjet Kosovës dhe Serbisë.

Ai tha se nuk ka të ardhme normale për dy vendet pa normalizimin e marrëdhënieve, gjë që duhet të arrihet me dialog.

“Kosova dhe Serbia kanë një ndikim të madh në vendet e Ballkanit Perëndimor. Presidentët e vendeve të Ballkanit Perëndimor me të cilët fola në Nju Jork shprehën shqetësimin për marrëdhëniet ndërmjet Serbisë dhe Kosovës,” tha Lajçak.

Ai tha se Bashkimi Evropian është i përkushtuar ndaj Ballkanit Perëndimor dhe se vendet e Ballkanit duhet ta marrin seriozisht momentin aktual.

Lajçak, për herë të parë ka folur për akuzat e kryeministrit Albin Kurti se po anon nga Serbia në dialogun e Brukselit.

Përveç njëanshmërisë, Lajçak u pyet nëse akuzat e Kurti janë problem për të ardhmen e dialogut.

“Kur nuk të pëlqen mesazhi ti provon të sulmosh dërguesin. Kështu funksionon. Dialogu është këtu që nga 2011. Ka pasë qeveri të ndryshme në Kosovë e Serbi, përfaqësues të ndryshëm nga BE-ja por dialogu është e vetmja rrugë, sepse fakti është shumë i thjeshtë – s’ka të ardhme europiane pa normalizim”, tha Laçak në forumin 2BS, që po mbahet në Budva.

Kurti akuzoi ndërmjetësin europian të dialogut për normalizimin e raporteve me Serbinë se është “pozicionuar” kundër Kosovës.

Pas dështimit të rundit të fundit të dialogut në Bruksel, Kurti në një konferencë për media në Prishtinë tha se dukej që kishte një koordinim mes presidentit të Serbisë, Aleksandar Vuçiq, dhe Lajçakut për, siç tha ai, krijimin e një “skenari alternativ, ku gjysma e marrëveshjes zbatohet”.